Lamay hinagisan ng granada, 6 sugatan

TUBAY, AGUSAN DEL NORTE – Sugatan ang anim katao makaraan ang pagsabog ng granada sa lamay ng pamilya Batas nitong Martes ng madaling araw.

Kuwento ni Julius Batas, nagsusugal at nag-iinoman ang suspek na si Ruel Bahan at mga kabarkada niya sa lamay ng kanyang yumaong anak.

Umalis saglit ang grupo at nang sila ay bumalik, sinunggaban ni Bahan ang kasamang si Bryan Bagaipo.

Aniya, may dalang baril at isang granada si Bahan. Naagaw ng kapatid ni Bahan ang baril, ngunit naihagis ang granada.

Napulot ni Bagaipo ang granada at naihagis sa labas ng bahay bago ito sumabog.

Sugatan sina Bagaipo, Junrey Batas, Eugene Pilo, Jeldy Acedo at ang mga batang sina Johnny Fabia at Zella Mitch Bahan.Sumuko si Bahan makaraan matulog sa bahay ng kanyang tiyahin at mahimasmasan. Aniya, inilibre niya ng inoman ang barkada ngunit ninakawan pa siya ni Bagaipo kaya siya nagalit.