HATAW! D'yaryo ng Bayan hatawtabloid.com
NAGTATAKA naman tayo kung bakit ipinipilit ng ibang grupo na nagbigay daw ng go signal si Pangulong Rodrigo Duterte kay Indonesian Joko Widodo para bitayin si Mary Jane Veloso.
Puwede ba, common sense lang ‘yan, may go signal man o wala si PRRD, Indonesia pa rin ang masusunod kung bibitayin o hindi si Veloso.
Anong pakialam nga ni Pres. Duterte sa batas ng Indonesia?! Ganoon ba kalakas ang kapangyarihan
Pero siyempre, bilang Filipino, nananalangin tayo na sana nga ay patawarin na si Jane ng gobyernong Indonesia at bigyan ng ikalawang pagkakataon.
At kung mabibigyan ng ikalawang pagkakataon si Jane, diyan na kailangan pumapel ang gobyernong Duterte.
Dapat ang gobyerno mismo ang umalalay para sa pagbabagong-buhay ni Mary Jane.
Para naman sa ating lahat, magsilbing aral ang nangyari kay Mary Jane lalo sa mga kababayan nating overseas Filipino workers (OFWs).
Huwag po kayong masilaw sa salapi. Alalahanin ninyong kaya kayo nagpapakahirap ay para mabigyan ng magandang kinabukasan ang pa-milya ninyo.
Kung magtutulak kayo ng droga, wala pong good karma. Darating ang panahon na sisingilin din kayo sa pagkakataon na hindi ninyo inaasahan.
Huwag rin kayong magpauto sa mga kaibigan ninyo na magpadadala sa inyong pagbiyahe.
Kung talaga namang hindi ninyo alam kung ano ang laman ng bag, mas lalong huwag kayong pumayag kung ayaw nilang buksan sa harap ninyo.
Maging segurista rin kayo lalo’t kaligtasan at buhay ninyo ang pinag-uusapan rito.
Para huwag na pong maulit itong nangyari kay Mary Jane, suportahan natin ang maigting na kam-panya kontra droga ng pamahalaang Duterte.
Hindi po puwedeng, ang pamahalaan lang ang nagsusulong ng kampanya, dapat ay kaagapay dito ang buong bansa.
Suportahan natin ang anti-illegal drug campaign at ang extrajudicial killings ay ipabahala natin sa tamang awtoridad.
Sabi nga, kung hindi kayo sangkot sa ilegal na droga, walang dapat ikatakot sa kampanya ni Pangulong Duterte at ni Chief PNP, Director General Ronald “Bato” Dela Rosa.
Para kay Mary Jane, uulitin lang po ng inyong lingkod, ipagdasal po natin na siya ay mabigyan pa ng ikalawang pagkakataon.
MAG-INGAT SA SCAM PROTEKTAHAN
ANG INYONG PERSONAL INFORMATIONS
Hindi na po bago sa atin ang iba’t ibang scam lalo na ang identity theft. Naging talamak ito dahil sa hindi tamang paggamit ng social media.
Ilang tip po para makaiwas sa identity theft:
Umiwas sa paggamit ng public wi-fi. Marami pong hackers ang kayang-kayang nakawin ang mahahalagang impormasyon tungkol sa inyo kapag naka-public wi-fi.
Kung mahilig kayong makipag-swap ng inyong lumang cellphone o iba pang gadget, tiyakin ninyo na walang naiwan na importanteng numero, mensahe, makompromisong retrato o video sa inyong ipagpapalit o ipagbibiling lumang gadget.
Huwag masyadong open sa pagse-share ng mga detalye tungkol sa inyong buhay sa social media (FB, TWITTER, INSTAGRAM & SNAPCHAT). Hindi kayo celebrities.
Huwag masyadong iladlad ang personal information na para kayong gumagawa ng resume o curriculum vitae.
Huwag i-post ang inyong bills and receipts na may kompletong pangalan, address at contact number.
Mag-ingat din sa pamamahagi ng inyong ID o calling cards.
Ilang tip lang po ‘yan.
Ibahagi rin ninyo sa inyong mga anak lalo na sa mga teenagers na nalululong sa social media.
Uulitin ko lang po, mag-ingat sa identity theft.
KAPAYAPAAN ANG GUSTO
YAP, isa po ang aming pamilya sa nakiisa sa pagdiriwang ng Eid’l Adha o feast of sacrifice ng mga Muslim kahapon. Nagsimula ang aming selebrasyon sa pamamgitan ng panalangin sa Mosque at pagbisita sa mga kapamilya at kaibi-gan bilang pagpapasalamat kay Allah at sa mga pagpapala Niya. Ang Eid’l Adha ay isa sa dalawang pinakaimportanteng pagdiriwang sa aming mga Muslim sa buong mundo. Kasabay ng aming mga panalangin ang panawagan hindi lang sa kapatid na Muslim kundi maging sa mga Kristiyano na magkaroon na ng kapayapaan at matapos na ang karahasan lalo na sa Mindanao na marami ang nagiging biktima nito.
Sa kabilang banda, ang ginagawa naman ng ating pamahalaan upang masugpo ang terorismo ay daan tungo sa mas mapayapang bansa na hindi na muling malulugmok sa takot at dahas dahil mayroon tayong gobyerno na handang tumugon sa mamamayan nito anuman ang relihiyon na kinabibilangan.
— Aarifah Jalali
Quiapo, Manila
