Style na tahimik ni Rita, ‘di na uso

HINDI na nabigla ang publiko nang tawagin ni Toni Gonzaga ang pangalan ni Badjao Girl na si Rita Gaviola bilang pangalawang evictee sa Bahay Ni Kuya noong Sabado ng gabi. Hindi kasi masyadong remarkable ang pag-stay ni Rita sa nasabing bahay. Napapansin lang siya kapag nagagalit pero sa ordinaryong araw na  hindi siya galit, nasa gilid lang siya at parang tipid na tipid sa pagsasalita.

Bukod kay Rita ay nominado rin for eviction sina Christian, Heaven, at Kristine.

Again, walang baring pa rin ‘yung Padaluck dahil si Rita ang nakakuha ng pangalawang pinakamataas na Padaluck. Sa ikalawang pagkakataon, si Christian uli ang nakakuha ng pinakakaunting Padaluck pero wala nga itong silbe dahil ang mananaig pa rin ay ang Ligtas Challenge ni Kuya.

Kailangang gumawa sila ng tore ng Rubiks cube at ‘yun na nga, si Rita ang nakagawa ng pinakamaigsing tore kaya siya ang na-out.

Well, hindi rin kasi nagpakitang gilas si Rita sa Bahay Ni Kuya kaya siya na-nominate. Oo, hindi nga hindi siya sanay sa ganyang eksena pero naroon na siya, dapat nakipaglaro na siya nang lubusan dahil kompetisyon iyon at ang kanyang mga nakakasama ay hindi basta-basta.

Minsan nga naringgan ko ang ilang housemates ng “o Rita, ano ang maiko-contribute mo?” dahil nga bilang housemate, kailangan din ni Rita ng output sa anumang task o pinag-uusapan sa loob.

Anyway, sana’y may natututuhan si Rita sa ilang linggo niyang pagtira sa Bahay Ni Kuya at since may manager na siya, tiyak magtutuloy-tuloy si Rita sa showbiz kaya lang dapat hindi na siya masyadong inferior,  minsan gumimbal din siya dahil hindi na uso ngayon ‘yung ganyang style na tatahi-tahimik.

MAKATAS – Timmy Basil