Negosyante sa drug watchlist patay sa ambush

CAUAYAN CITY, Isabela – Patay ang isang negosyante at ika-10 sa drug watchlist ng pulisya makaraan pagbabarilin ng hindi nakilalang mga lalaki kamakalawa.

Ang biktima ay si Kokrit Verzola, 37-anyos, aresidente ng Tallungan, Reina Mercedes, Isabela.

Ayon kay Chief Insp. Edgar Pattaui, hepe ng Reina Mercedes Police Station, nakikipag-inoman ang biktima sa kanilang lugar nang dumating ang dalawang suspek na lulan ng motorsiklo at pinagbabaril si Verzola.

Sinabi ni Pattaui, posibleng personal na alitan o may kaugnayan sa illegal na aktibidad ang motibo sa insidente.

Napag-alaman, kamakailan ay nakaaway ng biktima ang kanyang tiyuhin sa mismong establishment na pag-aari ni Verzola.

Lumalabas din sa kanilang pagsisiyasat na si Verzola ay number 10 sa talaan ng pulisya na minamanmanan dahil sa pagkakasangkot sa illegal na droga.