HATAW! D'yaryo ng Bayan hatawtabloid.com
MALUBHANG nasugatan ang isang 18-anyos out of school youth (OSY) makaraan pagtulungan saksakin sa harap ng mismo ng kanyang kasintahan ng tatlong nangursunadang mga suspek sa Navotas City kahapon ng madaling araw.
Ginagamot sa Tondo Medical Center ang biktimang si Markphil Cruz, ng #49 Ignacio St., Bacog, Tabing Dagat, Brgy. Daanghari ng nasabing lungsod.
Habang nakapiit sa detention cell ng Navotas City Police ang dalawa sa tatlong suspek na si Lucky Presquito, 21, ng Medium Rise Bldg., Kadiwa St., Brgy. San Roque, at ang 17-anyos binatilyo na dinala sa pangangalaga ng DSWD, samantalang pinaghahanap ang kasama nilang si alyas John-John.
Sa imbestigasyon ni PO2 Allan Bangayan, dakong 12:30 am kasama ng biktima ang kanyang kasintahan na si Jacklyn Guerrero at ilang kaibigan nang bigla silang harangin ng mga suspek.
Kinursunada ng mga suspek ang grupo ng biktima hanggang sa magrambolan na humantong sa pagsaksak sa binatilyo.
( ROMMEL SALES )
