Coed nag-selfie sa jeepney nadale

ZAMBOANGA CITY – Sugatan ang isang 18-anyos dalagita nang mahulog mula sa sinasakyang pampasaherong jeepney habang nasa kalagitnaan ng kanyang pagse-selfie sa highway ng Brgy. Upper Calarian sa Zamboanga City kamakalawa.

Kinilala ni Senior Inspector Hingming Ladjaali, hepe ng Zamboanga City police station 8, ang biktimang si Dorothy Tubal, nag-aaral sa isang kilalang pribadong unibersidad sa lungsod.

Ayon sa opisyal, habang masayang kumukuha ng ‘selfie’ ang biktima kasama ang kanyang kaklase, nabitawan niya ang kanyang cellphone.

Aniya, posibleng nawalan ng balanse ang katawan ng biktima nang subukan niyang abutin ang nahulog niyang cellphone kaya tuluyan siyang nahulog sa jeep papunta sa kalsada.

Agad itinakbo ng driver ng jeep sa ospital ang biktima.

Inihayag ng opisyal, walang planong magsampa pa ng kaso ang biktima at magulang sa driver ng sinakyan niyang PUJ.