HATAW! D'yaryo ng Bayan hatawtabloid.com
PATAY ang tatlong hinihinalang holdaper nang makipagbarilan sa mga operatiba ng Quezon City Police District (QCPD) makaraan holdapin isang ginang kahapon ng madaling araw sa nasabing lungsod.
Sa ulat kay QCPD director, Sr. Supt. Guillermo Lorenzo T. Eleazar, patuloy pa ring kinikilala ang napatay na tatlong holdaper sa Maximo Viola St., malapit sa Sto. Domingo St., Brgy. Sto. Domingo, ng lungsod.
Habang ang hinoldap ng mga suspek ay si Lita Madera, 47, residente ng 71 Alcaraz St., Brgy. Saint Peter, Quezon City.
Sa imbestigasyon pulisya, dakong 3:10 am habang naghihintay ng masasakyan si Madera sa Sto. Domingo St. nang lapitan siya ng mga suspek na lulan ng tricycle.
Tumakbo ang ginang ngunit hinabol siya ng mga suspek at hinablot ang kanyang bag,
Nagkataong dumating ang nagpapatrolyang mga operatiba ng La Loma PS1 na humabol sa mga suspek.
Nang maabutan sa Maximo Viola St., imbes na sumuko ay pinaputukan ng mga suspek ang mga pulis kaya napilitan ang mga awtoridad na gumanti ng putok na nagresulta sa pagkamatay ng tatlo.
( ALMAR DANGUILAN )
