Laban ng Gilas Pilipinas papanoorin ni Duterte

MALAKI ang tsansa na personal na panoorin ni Pangulong Rodrigo Duterte ang laban ng Gilas Pilipinas at France sa FIBA Olympic Qualifying Tournament sa Mall of Asia Arena bukas.

“He might watch,” matipid na sagot ni Presidential Spokesman Ernesto Abella nang tanungin kung manonood si Duterte ng laban ng Gilas at France.

Matatandaan, noong nakaraang buwan ay binisita ni Samahang Basketbol ng Pilipinas (SBP) executive director Sonny Barrios si Duterte sa Davao City para imbitahan na manood ng Olympic qualifier.

Noong Biyernes ay namataan si Special Assistant to the President Cristopher “Bong” Go, na nanood sa Gilas Pilipinas tune-up game laban sa koponan ng Turkey.

Target ng Gilas Pilipinas na makuha ang isa sa tatlong natitirang slot para makapasok sa Summer Olympics sa Rio de Janeiro, Brazil sa Agosto.

( ROSE NOVENARIO )