Digong bibiyahe sa commercial plane (Ayaw ng VIP treatment)

IBABALIK ni Pangulong Rodrigo Duterte sa Armed Forces of the Philippines (AFP) ang lahat ng air assets ng Office of the President (OP).

Sa kanyang opening statement sa kauna-unahang cabinet meeting sa Palasyo kahapon, sinabi ni Duterte na kakalawangin lang ang presidential plane sa kanyang administrasyon dahil commercial plane ang kanyang gagamitin sa pagbibiyahe.

Nais ni Duterte na gawing ospital na lang ang presidential plane para mapakinabangan.

Inatasan ni Duterte si Transportation Secretary Art Tugade na abisohan ang Civil Aviation Authority of the Philippines (CAAP) na huwag nang ipatupad ang patakaran na pagpapatigil ng biyahe ng lahat ng eroplano 30 minuto bago umalis o dumating ang aircraft na sakay ang Pangulo.

Ayaw ng Pangulo na bigyan siya ng special treatment at  mas gugustuhin niyang dumaan sa regular na proseso o pumila kaysa dagdagan pa ang kalbaryo ng mga pasahero.