PNoy handa nang umalis sa Palasyo (Nakaimpake na)

NAKA-IMPAKE na at handa nang umalis sa Palasyo si Pangulong Benigno Aquino III, ayon kay Communications Secretary Herminio Coloma Jr.

“Ang batid ko ay matagal nang naumpisahan ito at handang-handa na siyang lumisan sa araw ng Huwebes, Hunyo 30, sa susunod na linggo,” ani Coloma.

Isang linggo na lang ay papalitan na ni President-elect Rodrigo Duterte si Aquino sa isang simpleng inauguration ceremony sa Palasyo sa Hunyo 30.

“Mayroong established practice kasi na kapag nagpapalitan ng administrasyon, nagkikita ang outgoing at ang incoming President. Sa aking nabatid, maoobserbahan naman itong tradisyon na ito at magkakaroon ng pagkakataon na magkita si Pangulong Aquino at si President-elect Duterte bago manumpa sa tungkulin ‘yung bagong Pangulo,” dagdag ni Coloma.

Sa kanyang talumpati kahapon sa ika-118 anibersaryo ng Department of Foreign Affairs (DFA), ipinagmalaki ni Aquino na taas-noo niyang lilisanin ang Malacañang dahil tinupad niya ang mandato sa kanyang mga “boss.”

Binigyang-diin niyang naibalik niya ang karangalan ng Filipinas sa international community.

“Higit sa lahat, nabawi natin ang ating pambansang dangal. Kung dati, tayo ang binabalewalang kasapi ng pandaigdigang komunidad, ngayon isa na tayo sa tinitingalang bansa. Kung dati puro negatibong balita ang bumabandera tungkol sa Filipinas, ngayon isa na tayo sa laging napupuri,” sabi ni Aquino.