‘Constitutional dictatorship’ kabaliwan — Nene

CAGAYAN DE ORO CITY – Tinuligsa ni dating Senate president at PDP-Laban founding chairman Aquilino “Nene” Pimentel, Jr., si incoming presidential spokesperson Atty. Salvador Panelo sa ipinalutang na posibleng constitutional dictatorship sa ilalim ng Duterte administration.

Ito ay makaraan igiit ni Panelo na tanging nasa katauhan lamang ni President-elect Rodrigo Duterte ang pagsisilbi bilang constitutional dictator dahil sa taglay na political will habang ipinatutupad ang malawakang reporma sa bulok na sistema ng gobyerno sa bansa.

Sinabi ni Pimentel, dapat hindi paniwalaan ang pinagsasabi ni Panelo dahil hayagang ito ay pasakalye lamang.

Sinabi ng tinaguriang ama ng Local Government Code of the Philippines, isang ‘kabaliwan’ ang pinalulutang ni Panelo at nagsasalita nang walang basehan.

“Kung mula iyan kay Panelo, kalokohan iyan, hindi dapat paniniwalaan dahil abogado rin si President Digong at dapat sundin ang Saligang Batas,” ani Pimentel na nagsalita sa Cebuano.

Si Pimentel ay isa sa mga aktibong political opposition figure noong kapanahunan ni dating Pangulong Ferdinand Marcos, Sr., ilang beses na ipinakulong dahil sa matapang na pakikipaglaban sa batas-militar sa bansa.

Sinabi niyang ang dapat paniwalaan ng publiko ay mismong si Duterte dahil siya ang mas nakaaalam sa mga programa at direksiyon na tatahakin ng sambayanang Filipinas sa loob ng anim na taon.

Una rito, iginiit ni Panelo, kakailanganin ni Duterte ang hanggang 15 taon na pananatili sa poder para masiguro na maisakatuparan ang mga pangako sa taongbayan na pagbabago para sa bansa.