Big mining firms lagot kay Digong

ISA sa mga pinapaboran nating pronouncement ni Incoming President Rodrigo “Digong” Duterte ang kanyang pagtutol sa operasyon ng mga abusadong big mining firms na labis nang nakapipinsala sa kapaligiran at tila ayaw nang tantanan ang likas na yaman ng ating bansa.

Sa ibang bansa kasi, mayroong limitasyon ang operasyon ng isang mining company.

Hindi puwedeng lifetime.

Kung lifetime nga naman ang operasyon ng  mining company ‘e parang nabili na nila ang likas na yaman ng bansa.

Kahit na sabihin pa nilang nagbabayad sila ng kung ano-anong klase ng ‘taxes’ hindi rason ‘yun para salaulain habambuhay ang kalikasan at likas na yaman ng bansa.

Sa kanyang thanksgiving party sa Davao pinuntirya ni Mayor Digong ang malalaking kompanya ng minahan partikular sa Surigao del Norte. Minsan na rin tayong napunta sa lugar na ‘yan at marami tayong katutubo na nakausap at ang hinaing nila ang pang-aabuso ng mga minahan sa kanilang lugar na wala naman silang nakukuhang benepisyo.

Isa pa ang talamak na black-sand mining ng mga dayuhang Intsik sa iba’t ibang lugar sa ating bansa.

‘Yan din daw ang rason kung bakit hindi niya ibinigay ang posisyon bilang kalihim ng Department of Environment and Natural Resources (DENR) kay Leoncio Evasco, na kanyang national campaign manager.

Aniya, si Evasco ay dating political detainee noong siya ay naging city administrator.

Imbes si Evasco, mas gusto ni Duterte na ibigay ang posisyon sa isang militar.

Expected na ng incoming president na magrerehistro ng ‘resistance’ ang mining firms sa militar na kanyang itatalaga bilang DENR secretary.

Pero mukhang pirmis ang desisyon ng bagong Pangulo.

At kung hindi siya magluluwag sa desisyong ito, ‘yan ay malaking hakbang tungo sa isang tunay na pagbabago.

Suportahan ta ka diyan, Mr. President!

Para sa mga reaksiyon, suhestiyon, reklamo at sumbong, magtext sa 0926.899.91.27 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com