2 Nigerian timbog sa shabu

DALAWANG Nigerian national ang naaresto ng mga operatiba ng Quezon City Police District (QCPD) sa isinagawang buy-bust operation kahapon ng madaling araw sa nasabing lungsod.

Sa ulat ni Supt. Robert Sales, QCPD Batasan Police Station 6 commander, ang nadakip ay sina Charles Ujam alyas Taylor, 34, at Uche Adache, 26, kapwa residente ng 5301 Constantine St., Talon Dos, Las Piñas City.

Ayon kay Sales, isinailalim sa surveillance ng kanyang mga tauhan sa Station Anti-Illegal Drugs (SAID) ang dalawa makaraang makakuha ng impormasyon hinggil sa pagtutulak ng droga.

Nang magpositibo, ikinasa ang buy-bust operation laban sa dalawa dakong 3 a.m. sa Commonwealth Avenue, Brgy. Matandang Balara, Quezon City.

Makaraan bentahan ng dalawa ng shabu na nagkakahalaga ng P55,000 ang poseur-buyer ay agad dinamba ng mga pulis ang mga suspek.

Narekober sa dalawang dayuhan ang dalawang sachet ng shabu at boodle money.