Happinas Happy Hour, nagbawas ng budget kaya nagbawas din ng tao

PINATATAPOS na lang siguro ang mga artistang may guaranteed contract sa TV5 kaya na-extend ang Happinas Happy Hour na magiging isang oras na lang at bukod tanging sina Derek Ramsay, Janno Gibbs, Kim Idol, at Ogie Alcasid na lang ang main hosts dahil out na sina Gelli de Belen at Tuesday Vargas.

Nagbawas daw ng 41% sa budget ng Happinas Happy Hour ang TV5 management kaya kailangang magbawas din ng tao ang show na dapat sana ay totally tsugi na ang show, pero nakiusap daw ang namamahala ng programa bukod pa sa wala ring maibigay na bagong project sa mga nabanggit na main hosts dahil may kontrata pa sila sa TV5.

Pabor naman kay Gelli na nawala na siya sa Happinas Happy Hour dahil balik-ABS-CBN na siya at si Tuesday naman daw ay nag beg off.

Siguro naguguluhan na rin si Tuesday sa show kung saan ito patungo dahil laging may problema.

Maging ang mga staff ng TV5 ay nagtatanungan na rin kung ano pa ang mapapanood kapag tinanggal na ang entertainment shows nila lalo’t karamihan sa mga iprinisintang bagong programa ay hindi na pinatutuloy ng management tulad ng Mask Singer na pagkatapos i-present sa mga executive ay biglang sinabing shelved na.

Ano na nga ba ang nangyayari sa TV5, “eh, kasi ang gulo-gulo ng programming, saan ka nakakita ng teleserye na tatlong beses mo lang mapapanood sa isang linggo at naiiba pa ang oras?” ito ang katwiran sa amin ng mga nakakapanood sa Singko.

FACT SHEET – Reggee Bonoan