Raptors pinauwi ang Heat

BINUHAT nina Kyle Lowry at DeMar DeRozan ang Toronto Raptors upang isampa sa Eastern Conference Finals sa kauna-unahang pagkakataon kahapon matapos kaldagin ang Miami Heat, 116-89 sa Game 7 ng 2015-16 National Basketball Association, (NBA) semifinals playoff.

Nagtala sina Lowry at DeRozan ng 35 at 28 points para ilista ng Raptors ang 4-3 serye sa kanilang best-of-seven second round playoff.

Nagdagdag si center Bismack Biyombo ng 17 puntos at 16 rebounds para sa Toronto na haharapin ang EC defending champion Cleveland Cavaliers sa Finals.

Sa Western Conference Finals, magtatapat naman ang NBA defending champion Golden State Warriors at Oklahoma City Thunder.

Sa nalalabing segundo na lang ng  orasan, sumisigaw ang mga fans ng “We Want Cleveland!” kaya naman inaasahang magiging mainitan at mahigpit ang labanan ng dalawang koponan sa Martes ng gabi (Miyerkoles ng umaga sa Pinas).

Tumulong din sa opensa para sa Toronto sina DeMarre Carroll at Patrick Patterson na nagtala ng 14 at 11 markers ayon sa pagkakasunod.

Sina Dwyane Wade at Goran Dragic ang nanguna sa opensa para sa Heat na may tig 16 puntos habang kumana si center Justise Winslow ng 14 puntos  at walong boards.

Nakalamang lang ang Heat, 37-36 sa 5:41 mark sa second quarter matapos isalpak ni Joe Johnson ang kanyang hook shot.

ni Arabela Princess Dawa