Jobless tumungga ng lason (Nasibak sa trabaho)

PATAY ang isang lalaki makaraan uminom nang lason nang masibak sa trabaho kamakalawa ng gabi sa Malabon City.

Hindi umabot nang buhay sa Tondo General Hospital ang biktimang si Jonathan Odi, 31, ng Dulong Bronze St., Brgy. Tugatog ng nasabing lungsod.

Sa salaysay ng live-in ng biktima kina SPO2 Jerry Dela Torre at PO1 Jessie Mora, bago ang insidente ay nakipag-inoman ang biktima sa kanilang mga kapitbahay.

Nang umuwi ang biktima dakong 10:45 p.m. ay sandaling humiga sa kama ngunit makaraan ang ilang sandali ay kumuha ng baso, sinalinan ng likido saka ininom.

Huli na nang nalaman ng ginang na silver cleaning solution pala ang ininom ng biktima kaya isinugod niya sa pagamutan ngunit hindi na umabot nang buhay.

Ayon sa ginang, na-depress ang biktima nang masibak sa trabaho.