Pasya ng sambayanan iginagalang ng Palasyo

KINIKILALA at iginagalang ng Palasyo ang pasya ng sambayanang Filipino sa nakalipas na halalan o ang pagwawagi ni presumptive president Rodrigo Duterte.

Sinabi ni Communications Secretary Herminio Coloma Jr., ang landas ng mabuting pamamahala o “Daang Matuwid” ay naitatag na at lahat ng presidentiables ay kontra-korupsiyon at pabor sa pagpapatuloy at pagpapalawak ng kasalukuyang pro-poor programs at isusulong ang mga inisyatiba upang hindi maudlot ang matatag na ekonomiya at makamit ang “inclisuve growth.”

“Daang Matuwid may be called different names, but its purpose and spirit will have lasting impact, and continue to shape the consciousness of our people and those that serve them in accordance with the principles of good governance and responsible citizenship,” ani Coloma.

Samantala, pinabulaanan ni Coloma ang ikinakalat na balitang may ikinakasang plano ang Liberal Party upang mapatalsik agad sa puwesto si Duterte para mabilis na mailuklok ang manok nilang si Leni Robredo sa Malacañang.

Itinanggi rin ni Coloma na may 80% na ng 2016 national budget ang nagasta ng administrasyong Aquino dahil puwedeng tunghayan sa mga website ng bawat ahensiya ng pamahalaan ang detalye nang ginastang pondo.