Vote Buying talamak sa Eastern Visayas (Pekeng pera ipinamimigay)

TACLOBAN CITY – Talamak pa rin ang vote buying sa maraming lugar sa Eastern Visayas at hindi ito ikinakaila ng maraming mga botante.

Sa nakuhang impormasyon, mismong barangay officials pa ang nangunguna sa pamimigay nito.

May ilang reklamong natatanggap ang himpilan tungkol sa mga pekeng pera na ipinamimigay sa bahagi ng Marabut Samar.

Ayon sa hindi nagpakikilalang botante, aabot mula sa P2,000 hanggang P10,000 ang vote buying sa kanilang bayan.

Reklamo ng ilan, may pekeng ipinamimigay kaya ganito na lang kalaki ang bigayan.

Ngunit komento ng isang kandidato, hindi raw nagmula sa kanila ang pera at posibleng estratehiya ito ng kabilang kampo para magalit sa kanila ang taongbayan.

Samantala, nagkaroon ng kaguluhan sa bahagi ng Northern Samar habang namimigay ng pera bilang pagsuporta sa isang kandidato.

Wala pang naiuulat na nahuling politiko o kandidato na may kaugnayan sa vote buying sa buong rehiyon.