3 drug pusher utas sa shootout sa Bulacan

PATAY ang tatlong hinihinalang drug pusher makaraan makipagpalitan ng putok sa mga tauhan ng Bulacan Police habang sila ay inaaresto sa Sitio Tabing Ilog, Brgy. Poblacion, Sta. Maria, Bulacan kamakalawa ng gabi.

Kinilala ni Bulacan PNP Director, Senior .Supt. Romeo M. Caramat Jr., ang isa sa tatlong napatay na si Mark Gonzales, alyas Makol, residente sa nabanggit na lugar, may nakabinbing kaso ng illegal possession of firearms and ammunition sa Gapan City, Nueva Ecija.

Sa inisyal na ulat ng pulisya, dakong 10 p.m. nang mangyari ang insidente nang isilbi ng mga pulis ang arrest order laban sa mga suspek.

Ngunit imbes na sumuko ay lumaban ang mga suspek at nakipagbarilan sa mga pulis na humantong sa kanilang kamatayan.

Narekober sa pag-iingat ng mga suspek ang isang kalibre .38 revolver na may lamang dalawang bala, isang  improvised shotgun na may lamang basyo ng bala, mga basyo ng 9MM, siyam piraso ng maliit na plastic sachet ng shabu, tatlong disposable lighter at isang improvised tooter.