Rape sa taxi binubusisi ng LTFRB

INIIMBESTIGAHAN na ng Land Transporation Franchising and Regulatory Board (LTFRB) ang hinggil sa halinhinang panggagahasa ng isang taxi driver at isa pang lalaki sa isang babaeng pasahero nitong Lunes sa Antipolo City.

Ayon kay LTFRB Board Member Ariel Inton, nakikipag-ugnayan na sa kanya ang may-ari ng taxi unit na Legacy Transport Corp (AAP 7886).

Sa inisyal na ulat, sumakay ang biktima sa taxi sa Quezon City at nagpapahatid sa Mandaluyong ngunit dinala ng driver ang sasakyan sa Antipolo City.

Habang papuntang Antipolo, itinabi ng driver ang taxi at mabilis na bumaba mula sa compartment ang kasabwat niyang suspek saka sumakay sa taxi.

Pagdating sa Antipolo, ipinaikot-ikot ng driver ang sasakyan habang ginagahasa ng isa ang biktimang 25-anyos. Pagkaraan ay hinalay rin ng driver ang babae.

Nakuha ng biktima ang plate number ng taxi nang ibaba siya sa nasabi ring lungsod.

Samantala, inaalam pa ng LTFRB ang sinasabi ng may-ari ng unit na bago ang nangyari panghahalay ay kinarnap ng mga suspek ang taxi.