Paslit patay sa umatras na jeepney

PATAY ang isang batang lalaki nang maatrasan ng pampasaherong jeep habang naglalaro sa kalsada sa Caloocan City kamakalawa ng hapon. 

Hindi na umabot nang buhay sa Valenzuela General Hospital sanhi ng pinsala sa ulo ang biktimang si Joshua Lungakit Corpuz, 4-anyos, residente sa NPC Road, Brgy. 16, Kaybiga ng nasabing lungsod.

Nakapiit na sa detention cell ng Caloocan City Police at nahaharap sa kasong reckless imprudence resulting in homicide ang driver ng jeep na si Leo Gitigan Salar, 38, kapitbahay ng biktima.

Sa ulat ni PO3 John Paul Duran, naganap ang insidente dakong 5:30 p.m. sa Teofilo St., Brgy. 166, Kaybiga.

Ayon sa ulat ng pulisya, umaatras ang pampasaherong jeep ((TXE-317) na minamaneho ni Salar sa naturang lugar nang masagi ang naglalarong biktima.

Dahil sa lakas ng pagkakasagi, tumama ang ulo ng biktima sa semento dahilan ng pagkabagok ng kanyang ulo.

Isinugod ng mga saksi ang biktima sa pagamutan ngunit hindi na umabot nang buhay habang ang driver ng jeep ay sumuko sa mga awtoridad.