HATAW! D'yaryo ng Bayan hatawtabloid.com
HINDI man ganoon kadalas makapanood ng pelikulang Filipino o TV show si Energy Secretary Jericho Petilla, aware naman ito sa kalagayan ng industriya. Paano’y nakakahalubilo nito ang ilan sa mga artista tulad nina Richard Gomez at Sen. Jinggoy Estrada.
Si Richard ay nakasabay niya minsan sa eroplano at nakapagkuwentuhan sila.
“Si Richard, taga-amin ‘yan. Tumatakbo na mayor. Si Lucy (Torres-Gomez) tumatakbo rin na congresswoman.
“Noong hindi pa tumatakbo si Richard, nagkasabay kami niyan sa eroplano, nag-usap kami. Tanong siya ng tanong tungkol sa politika. Ako naman, tanong ng tanong sa showbiz. Tinanong ko siya. ‘Bakit ka ba nag-TV dati? Bakit galing ka sa sine eh nag-‘Palibhasa Lalake’ ka?
“Ang sabi niya, ‘Ang pelikula, medyo pawala na nang pawala. Pababa na nang pababa ang budget at pababa nang pababa ang talent fee. So inunahan ko, sa TV, parang investment.
“Ang pelikula, parang sa politika rin, kapag hindi ka nakikita, nakakalimutan ka. Kapag aasa ka lang sa pelikula at walang offer, isang taon kang walang pelikula, medyo nanganganib ka. Mabuti ang TV, paulit-ulit, ang market value mo, nariyan lang.
“Ang sabi ko, may pagkakahawig pala ito sa politika,” kuwento ni Petilla minsang makahuntahan namin ito sa isang pananghalian. Kasama niya noon ang kanyang asawa at mga anak.
Kaklase naman niya si Jinggoy noong high school at sinabing hindi pa niya nadadalaw ito dahil sa kawalan ng oras.
Senatorial candidate ng Liberal party si Petilla at kung papalarin ay magiging priority niya ang pagkakaroon ng better legislation para sa enerhiya, edukasyon, at kalusugan.
Gusto rin daw niyang tulungan ang maliliit na movie producers sa pamamagitan ng pagbibigay ng subsidy ng gobyerno sa mga quality na inilalahok sa iba’t ibang international fim festivals.
Ani Petilla, kung mayroong Metro Manila Film Festival tuwing Pasko, dapat ay hindi lamang tuwing Kapaskuhan mayroong festival bagkus ay magkaroon din ng regional film festival na makatutulong sa local movie industry.
Fan din kasi ng mga pelikulang Filipino si Petilla at aminado siyang nagustuhan niya ang Walang Forever na pinagbidahan nina Jericho Rosales at Jennylyn Mercado.
Bukod sa kapangalan niya si Jericho, isa rin ito sa mga paborito niyang artista na lalo pa niyang hinangaan nang mapanood ang nabanggit na pelikula.
SHOWBIZ KONEK – Maricris Valdez Nicasio
