2 bangkay nahukay sa bahay ng tulak

DALAWANG bangkay ng lalaki na napaulat na nawawala noong nakaraang buwan, ang nahukay sa ground floor ng isang bahay na pag-aari ng isang sinasabing sangkot sa ilegal na droga sa Caloocan City kahapon ng umaga.

Halos naaagnas na ang katawan ng mga biktimang sina Reynaldo Velasco, 62, ng Blk. 10, Lot 7, Section 8, Phase 1, Muzon, Pabahay 2000, San Jose Del Monte, Bulacan at isang Reginald, nahukay sa ilalim ng bahay na pag-aari ni Khalid Moda sa Phase 12, Brgy. 188, Tala ng nasabing lungsod dakong 10 a.m.

Lumalabas sa imbestigasyon ng pulisya, si Moda ay sangkot sa pagpapakalat ng ilegal sa droga sa nasabing lugar at nahulihan ng shabu noong Oktubre 12, 2015 ngunit nakalabas mula sa Caloocan City Jail noong Nobyembre 16 makaraang magpiyansa.

Ayon kay Caloocan City police chief S/Supt. Bartolome Bustamante, si Velasco ay unang napaulat na nawawala makaraang i-report sa pulisya ng kanyang anak na babae na si Rachel nitong Enero 28, makaraang isama ni Reginald at iangkas sa motorsiklo saka nagpunta sa hindi pa matukoy na lugar sa Bulacan.

Mula noon ay hindi na nakita ang dalawa hanggang makatanggap ng impormasyon ang pulisya na may nakitang mga bangkay sa loob ng compound ni Moda.

Hinala ng pulisya, posibleng may kinalaman sa illegal na droga ang pagpatay sa mga biktima dahil sinabi ng anak ni Velasco sa mga awtoridad na gumagamit ng droga ang kanyang ama.

Patuloy ang masusing imbestigasyon ng mga awtoridad upang matukoy ang pagkakakilanlan ng responsable sa insidente at hinahanap si Moda.