Tiket para sa Game 7 ng PBA Finals sold out na

HALOS 20,000 na manonood ang inaasahang dadagsa sa Mall of Asia Arena sa Pasay para sa Game 7 ng Smart BRO PBA Philippine Cup Finals ng San Miguel Beer at Alaska mamayang gabi.

Sinabi ni PBA Media Bureau Chief Willie Marcial na halos sold out na ang mga tiket mula noong Sabado nang magsimulang maglabas ang liga ng mga tiket para sa laro.

“We only have SRO (standing-room-only) tickets for Game 7 because tickets for patron seats, lower box and almost all upper box areas were sold out already,” wika ni Marcial. “Pati sa mga SM outlets, ubos na ang mga tiket. Siguradong mapupuno ang venue at ang maganda, you don’t really know which team will win.”

Ang record ng pinakamaraming taong nanood ng isang laro ng PBA sa MOA ay noong araw ng Pasko nang tinalo ng Barangay Ginebra ang Purefoods Star, 92-89, sa overtime.

( James Ty III )