HATAW! D'yaryo ng Bayan hatawtabloid.com
MAS titindi pa ang mga emosyon, liliyab pa ang mga pasabog, at tiyak mas pakatututukan ng manonood ang mga kaganapan sa nalalapit na pagtatapos ng pinakamainit na serye sa primetime ngayon, ang Pasion De Amor.
Patuloy na tumitibay ang samahan at mas nabubuo ang tiwala sa isa’t isa nina Juan (Jake Cuenca), Oscar (Ejay Falcon), Franco (Joseph Marco) Norma (Arci Munoz), Sari (Ellen Adarna), at Jamie (Coleen Garcia) sa kanilang pagtutulong-tulong para pagbayarin si Gabriela (Teresa Loyzaga) sa mga kasalanan.
Maging si Gabriela ay dahan dahan na ring inaako ang mga nagawa na siyang mag-uudyok kina Norma na isuko sa awtoridad ang sariling ina. Tuluyan na bang magpapaubaya si Gabriela sa kagustuhan ng mga anak sa pag-asang makuha muli ang tiwala at pagmamahal nila?
Kung kailan akala ng lahat ay unti unti nang naisasaayos ang lahat, doon naman makatatakas si Gabriel (Wendell Ramos) sa kulungan para muling yanigin ang mga buhay nila. Paano muling bubuwelta sa mga Samonte at Elizondo si Gabriel?
Simula nang umere ang Pasion De Amor noong Hunyo ay talaga namang tinutukan na ito ng sambayanan at hindi matinag pagdating sa ratings. Pumalo ito sa pinakamataas na national TV rating na 29.2% noong Oktubre, base sa datos ng Kantar Media. Lagi rin itong kabilang sa top ten na pinakapinanonood na programa tuwing weekdays.
Huwag palampasin ang huling apat na linggo ng Pasion De Amor, Lunes hanggang Biyernes, bago mag-TV Patrol sa Primetime Bida ng ABS-CBN.
SHOWBIZ KONEK – Maricris Valdez Nicasio
