PH no. 2 sa ‘most dangerous place’ para sa media (Sa IFJ report)

PINALAGAN ng Malacañang ang ulat ng International Federation of Journalists (IFJ), nagsasabing pumapangalawa ang Filipinas sa Iraq bilang pinakadelikadong lugar para sa mga mamamahayag.

Sa nasabing report, lumalabas na mas ligtas pa sa mga journalists ang mga bansang halos araw-araw ay may bombahan o karahasan at mga bansang may ‘restriction’ o pagbabawal sa malayang pamamahayag.

Bukod sa pagpalag, naghugas-kamay din ang Malacañang sa naitalang media killings sa bansa.

Sinabi ni Communications Sec. Sonny Coloma, ang mataas na bilang ng patayang naitala sa Filipinas ay galing sa Maguindanao massacre noong 2009.

Ayon kay Coloma, binuwag na ng Aquino administration ang makinarya ng ‘impunity’ o kawalan ng pananagutan sa pamamagitan ng mga reporma at paglilitis sa mga sangkot sa masaker.

Makaraan aniya ang EDSA People Power Revolution, naging bagong ‘bastion’ o balwarte ng kalayaan sa pamamahayag at press freedom ang Filipinas, na walang ipinaiiral na prior restraint o internal security regulations na sagabal sa trabaho ng mga mamamahayag.

“The high number of killings attributed to the Philippines includes those slain in the Maguindanao massacre in 2009. The Aquino administration has dismantled the machinery for impunity by putting in place governance reforms and prosecuting those implicated in the massacre. Since the triumph of the EDSA People Power revolution, the Philippines has become anew a bastion of freedom expression and of the press where there is no prior restraint or internal security regulations that hinder the work of journalists,” ani Coloma.