HATAW! D'yaryo ng Bayan hatawtabloid.com
ISA ang komedyanteng si Atak Araña sa napapanood sa Wansapanataym Presents: Susi ni Sisay ng ABS CBN na tinatampukan ni Sharlene San Pedro.
Ayon kay Atak, masaya siyang maging bahagi ng show na pinamamahalaan ni Direk Wenn V. Deramas at tinatampukan din nina Jolina Magdangal, Marvin Agustin, Tetchie Agbayani, Matet de Leon, Marco Masa, at iba pa.
Nang usisain namin ukol kay Sharlene, pinuri niya ang young actress.“Oo kuya, maayos katrabaho si Sharlene. Masaya kami, mahusay siya at mabait,” wika ni Atak.
Ano ang papel niya rito?
“Ako si Leann dito, ang katulong ni Sisay (Sharlene) sa palengke. Ako ang nagtatanggol sa kanya kapag may nang-aaway sa kanya!”
Nagkuwento rin si Atak ukol sa nalalapit niyang Valentine’s show sa Music Box kasama ang magagaling na Diva sa comedy bar. “Sa Pre-Valentine’s show ko naman sa Feb.12 sa Music Box, kasama ko ang tatlo sa pinakamahusay na diva voice-alike sa comedy bars ng bansa. Sila sina Crissy na kaboses ni Mariah Carey. Raven na ang kaboses naman ay si Beyonce at Regina na kaboses ni Regine Velasquez.
“Sa show, aatakin ko sila sa pamamagitan ng pagdu-duet sa kanila! Walang script ito, gusto kong maging spontaneous lang ako sa gabing ‘yun! Gusto ko na spontaneous para natural lang ang da-ting sa audience, kuya.
“Pero siyempre, hindi lang kantahan ito, sure rin na riot ito sa katatawanan.”
ALAM MO NA! – Nonie V. Nicasio
