Erap, umamin kay Korina na si Mar ang karapat-dapat maging pangulo!

TUWANG-TUWA ang beteranang broadcast journalist na si Korina Sanchez-Roxas nang bigla niyang nakita ang dating Pangulo na ngayon ay alkalde ng Maynila na si Joseph “Erap” Estrada noong nakipiyesta sila sa pista ng Sto. Niño sa Tondo, Manila.

Kasama ng misis ni Mar Roxas na naglibot sa mga kalye ng Tondo ang senatoriable na si Risa Hontiveros at si Aika Robredo, isa sa mga anak na babae ni Vice-Presidentiable  Leni Robredo.

Game na game na nakipagbiruan sa isa’t isa sina Koring at Erap na siya namang ikinagalak ng mga taga-Tondo at ng kanilang mga kasama.

“Sir, sexy kayo ngayon and banat na banat ang mukha, ano po ang inyong sikreto?” pabirong tanong ni Korina.

“Ikaw naman Koring, ‘wag tayo rito magsabihin ng sikreto sa harap ng madlang pipol noh,” mabilis namang sagot ng dating aktor.

Ang ikinagulat at ikinatuwa ni Koring ay ang masinsinan nilang usapan  ni Erap na buong tapang na sinabi sa kanya nito na si Mar ang manok niya sa lahat ng mga tatakbo sa pagka-pangulo kahit na hindi bahagi si Erap ng Liberal Party.

“Korina I always tell everyone and will tell you again that I think Mar Roxas is the most qualified to become president,” ani Erap kay Korina.

Dahil dito, parang nawala ang pagod ni Korina at lalo pang ginanahang makisaya kasama ang buong Tondo sa pista ng Sto. Niño.

SHOWBIZ KONEK – Maricris Valdez Nicasio