HATAW! D'yaryo ng Bayan hatawtabloid.com
PINURI ni Gov. Vilma Santos ang husay at dedikasyon ni Xian Lim sa trabaho nito bilang artisa. Ang pagpuri ay naganap sa grand presscon ng Everything About Her na pinagbibidahan din ni Angel Locsin at idinirehe ni Binibining Joyce Bernal.
Ani Ate Vi, may paglalagyan sa entertainment industry ang talent ni Xian.
Sinang-ayunan naman ito ni Direk Joyce at sinabing ang husay ni Xian ay nakikita sa mga eksenang kahit hindi niya kinailangang umarte ay nagbibigay ito ng extra effort.
Mahusay, masarap katrabaho, at masayang kasama naman ang sinabi ni Angel ukol kay Xian. Kaya nagtataka raw siya kung bakit maraming basher ang actor at sinasabing hindi ito karapat-dapat sa proyektong ito.
Hindi naman naitago ni Xian ang reaksiyon sa mga papuring sinabi sa kanya ng mga kasama niya sa Everything About Her. Tila gumaralgal ang boses nito at medyo napaluha at sinabing malaki ang pasasalamat niya sa Star Cinema dahil isinama siya sa proyektong ito.
Pinasalamatan din niya si Binibining Joyce sa tiwalang ipinagkaloob nito sa kanya gayundin si Gov. Vi na laging nagpapaalala sa kanya na everything is a learning process.
Nakasentro ang Everything About Her kina Vivian (Vilma) at Jaica (Angel). Isang matinik at istriktong “power lady” si Vivian na tinamaan ng isang malubha at terminal na karamdaman. Mapipilitan siyang kumuha ng isang nars, si Jaica na siyang mag-aalaga sa kanya para itago sa mga kasamahan at mga empleado na siya ay may kanser. Mahirap man para kina Vivian at Jaica na sila ay magkasundo, inutusan ni Vivian si Jaica na pauwiin ang kanyang anak na si Albert (Xian) na nakatira sa Amerika dahil siya ay umaasang maaayos ang nasira nilang relasyon.
Ang Everything About Her ay handog ng Star Cinema at mapapanood na sa January 27.
SHOWBIZ KONEK – Maricris Valdez Nicasio
