Shy, masusubok ang galing sa Tasya Fantasya

HALOS magkasabay na inilunsad sina Nadine Lustre at Shy Carlos sa pamamagitan ng Pop Girls ng Viva Entertainment. Pero naunang nabigyan ng break si Nadine at malayo-layo na ang narating simula nang itambal kay James Reid. Ikinokompara ngayon si Shy kay Nadine gayundin ang pakikipagtambal ng una kay Mark Neumann na sinasabing JaDine in the making.

“Siyempre po, proud ako kay Nadine kasi sabay kaming pumasok sa Viva, sabay kaming nag-start and para makita mo na ‘yung isang kasabayan mo, ganyan na ‘yung naabot niya, siyempre sobrang happy and proud ako sa kanya kasi natutulungan niya ‘yung family niya and ‘yung dream niya, kasi parehas kaming nag-start sa commercial, so bata pa lang kami, heto na ‘yung gusto naming  maabot. So ngayon na nariyan na, very happy and proud ako sa kanya,” panimula ni Shy sa presscon ng pagbibidahan niyang handog ng Viva Communications, ang Tasya Fantasya na mapapanood sa TV5 simula February 6, Sabado.

Malaki ang pasasalamat ni Shy dahil sa kanya ibinigay at ipinagkatiwala ng Viva Communications at TV5 ang Tasya Fantasya katambal si Neumann.

“Sobrang thankful po ako, kasi matagal na rin ako sa Viva and eversince talagang binibigyan nila ako ng project para mag-improve ako. And ngayon nga, ito ang ibinigay nila, ang ‘Tasya Fantasya’, so sobrang thankful ako,” giit pa ng batang aktres.

At dahil loveteam, natanong ang dalawa kung possible kaya silang ma-inlove sa isa’t isa?

“We can become committed, too,” pagbibiro ni Neumann.

“Siyempre po since first time naming magkatrabo, susubukan naming pagandahin at maging maganda ang chemistry namin para mahalin ng mga tao. ‘Yun po ang puwede naming gawin,” sambit naman ni Carlos na hindi pa nagkaka-boyfriend eversince.

Sinabi pa ni Shy na hindi lovelife ang focus niya kundi ang trabaho. Kaya naman ibibigay niya ang lahat-lahat para naman suklian ang tiwalang ibinigay sa kanya ng Viva.

Makakasama nina Neumann at Carlos sa Tasya Fantasya  sina Freddie Webb, Ara Mina, John Lapus, Candy Pangilinan, Giselle Sanches, AJ Muhlach at marami pang iba mula sa direksiyon ni Ricky Rivero.

SHOWBIZ KONEK – Maricris Valdez Nicasio