Michael, inaani na ang sipag at tiyagang ipinundar

Isang clean cut na Michael Pangilinan ang humarap sa amin isang hapon sa Dong Juan Restaurant. Ibang-ibang hitsura ngayon ni Michael kompara noong una namin siyang nakakahuntahan. Mas bumagay ang bago niyang gupit dahil lalong lumabas ang kaguwapuhan.

Nakatutuwa rin na tila nagbago na ang pananaw niya sa buhay ngayon. Mas matured na siya lalo na sa paghawak ng pera. Hindi tulad noon na sige lang siya sa pagbili ng kung ano-ano. Iba na talaga kapag may responsibilidad na. At ito ay ang kanyang anak.

Apat na taon na pala sa industriya si Michael at nakatutuwang malaman na malayo na rin ang narating niya. Marami na siyang nakamit at marami pa ang parating. “Naaalala ko pa noon, pilit lang akong isinisingit ng manager kong si Nanay Jobert Sucaldito sa show ng kanyang mga kaibigan para magka-break o exposure lang. Ngayon, ang dami nang inquiries,” masayang pagbabalita sa amin ni Michael.

“I feel so blessed dahil marami akong work ngayon. I am thankful kay Lord dahil unti-unti kong natutupad ang pangarap ko—ang makilala ng kaunti, mabili ang mga gusto kong bilhin, nakabili na ako ng 3 kotse and next time, bahay naman, pag-iipunan ko talaga,” sambit pa ng bagets na malaki ang pasasalamat sa Star Music, MOR 101.9, at ABS-CBN dahil sa tiwalang ipinagkaloob sa kanya.

“I have few shows na ikina-excite ko. I am guesting sa #alwaysEA concert ng kaibigan kong si Edgar Allan Guzman sa Music Museum this coming Saturday, January 16, 8:00 p.m.. I will be in Tondo, Manila earlier that day para sa kanilang piyesta with Kuya Duncan Ramos at iba pang artist.

“The next day naman ay sa Pandacan, Manila ako for their fiesta with kuya Aljur Abrenica, KZ Tandingan, Mama Boobsie Wonderland, at Andrew E.

“This Valentine season, magkakaroon ako ng special shows sa CSI La Union sa February 13 and Pavillion Mall sa Binan, Laguna sa February 14. Sa malls ang Valentine shows ko this time para maiba naman. I am also touring the 9 Xentro malls this month till end of February,” pagbabalita pa ni Michael.

At ang pinaka-excited na si Michael ay ang pinakamalaki niyang concert para sa kanyang 21st birthday sa November. “Ito na ang pagtupad ng pangarap kong makapag-perform in my own concert sa isang malaking venue,” giit ni Michael na malamang ay gawin sa Araneta Coliseum.

Congrats Michael, iba talaga ang nagagawa ng may tamang direksiyon ang career at marunong maghintay.

SHOWBIZ KONEK – Maricris Valdez Nicasio