Semis target ng AMA

KAHIT wala na ang ilang mga dati nitong manlalaro, pakay pa rin ng AMA Online Education na makapasok sa semifinals ng PBA D League Aspirants Cup simula sa Enero 21.

Lumipat na sina James Martinez at Jay-R Taganas sa Jumbo Plastic Linoleum ng Pilipinas Commercial Basketball League kaya napilitan si coach Mark Herrera na kunin ang mga bagong manlalaro bilang mga kapalit.

Ilan sa mga baguhang kinuha ng AMA ay sina Oda Tampus at Julian Sargent ng La Salle, Mark Romero ng St. Benilde, Bobby Balucanag ng San Sebastian, Ivan Hernandez ng Cagayan Valley at Ryan Arambulo ng Wang’s Basketball.

Parehong nag-enroll sina Hernandez at Arambulo sa AMA bilang bahagi ng pagiging school-based team ng Titans sa D League.

Idinagdag ni Herrera sina Gab Daganon at Ric Gallardo mula sa Perpetual Help.

Umabot ang AMA sa quarterfinals ng huling Foundation Cup ngunit natalo sila sa Rising Suns.

( James Ty III )