Rider patay, angkas kritikal sa SUV

PATAY ang isang lalaking lulan ng motorsiklo habang kritikal ang kanyang kapatid makaraang banggain ng SUV sa Brgy. Holy Spirit, Quezon City kamakalawa ng gabi.

Kinilala ni Supt. Richie Claraval, hepe ng Quezon City District Traffic Enforcement Unit (QCDTEU) ang namatay na si Benjamin Abundo, 35, empleyado ng pest control company, ng Wallnut St., Brgy. West Fairview, Quezon City. Habang nakaratay sa East Avenue Medical Center ang kanyang sugatang kapatid na si Junjun.

Agad sumuko ang driver ng Ford Escape SUV (WJO- 243) na si Eve Margarette Kuroke, 24, college student, residente ng B6, L29 Ephesus St., North Olympus, Novaliches ng nabanggit na lungsod.

Ayon kay PO2 Alfredo Moises, traffic investigator, naganap ang insidente sa De Leon St., Brgy. Holy Spirit ng lungsod dakong 10:56 p.m.

Nabatid sa ulat, kapwa tumatakbo sa magkahiwalay na direksyon ng kalye ang mga biktima at ang suspek nang biglang pumaling ng direksiyon ang SUV dahil umano sa pag-iwas.

Bunsod nito, napunta ang SUV sa kabilang linya at nasalpok ang motorsiklo.

Nahaharap ang suspek sa kasong homicide, serious physical injuries with damage  to property.