Ravena, Valdez Kumita ng P500,000 para sa mga nasalanta ng bagyo

PAREHONG natuwa ang dalawang pambatong atleta ng Ateneo de Manila na sina Kiefer Ravena at Alyssa Valdez sa suporta ng mga kaibigan nila sa UAAP basketball at volleyball sa charity game na FASTBR3AK na ginanap noong Disyembre 23 sa The Arena sa San Juan.

Kumita ng P500,000 sina Ravena at Valdez at ibinigay nila ang halaga sa Philippine National Red Cross sa pangunguna ni Tserman Richard Gordon para sa mga nasalanta ng bagyong Nona na tumama sa Samar, Mindoro at Sorsogon.

Nanalo ang Red Team ni Valdez kontra sa Green Team ni Ravena, 22-25, 25-21, 30-28.

Ilan sa mga manlalarong nakasama nina Ravena at Valdez ay sina Gretchen Ho, Michelle Gumabao, Jaja Santiago, Charo Soriano, Denden Lazaro, Gelo Alolino, Richard at Russell Escoto, Kevin Ferrer, Bang Pineda, Jem Ferrer, Ella de Jesus, Michelle Morente at ang aktres na si Yayo Aguila.

“Importante nakakatulong kami sa tinamaan ng bagyo, ’di lang kami masaya sa Christmas sila rin, kahit papaano makaka-uplift ng spirit,” wika ni Ravena.

Marami ang nagulat sa mahusay na paglalaro ng volleyball ng magkapatid na Escoto dahil dati silang mga volleyball players noong high school bago sila nag-basketball sa Far Eastern University na nagkampeon sa UAAP kamakailan.

Pagkatapos ng Kapaskuhan at Bagong Taon ay mag-e-ensayo uli si Ravena sa Gilas Pilipinas bilang paghahanda sa kanyang pagpasok sa 2016 PBA Rookie Draft habang pangungunahan ni Valdez ang kampanya ng Ateneo Lady Eagles sa pagdedepensa ng kanilang titulo sa UAAP women’s volleyball na magsisimula sa Pebrero. ( James Ty III )