HATAW! D'yaryo ng Bayan hatawtabloid.com
SINASABING ang tambalang James Reid at Nadine Lustre ang pambato at pantapat ng Star Cinema, Viva Films, at MerryGalo sa pelikula ninaVic Sotto at Ai Ai delas Alas. Kasama kasi nina Vic at Ai Ai ang isa rin sa malakas na tambalan, ang Alden Richards-Maine Mendoza tandem o ang AlDub.
Pero kompiyansa ang Star Cinema maging ang bida nitong sina Vice Ganda at Coco Martin na malaki ang magiging laban ng pelikula nilangBeauty and the Bestie sa takilya.
Hindi lang kasi ang walang humpay na kasiyahan at tawanan para sa buong pamilya ang mapapanood sa Metro Manila Film Festival entry na ito na idinirehe ni Wenn Deramas, kundi maging ang nakakikilig na moment ng JaDine na talaga namang klik na klik sa publiko.
Nakasentro ang pelikula kina Erika (Vice), isang baklang photographer at sa bestfriend nitong si Emman (Coco), isang special agent. Aalukin ni Emman si Erika ng isang sikretong misyon na magpanggap bilang nawawalang Miss Uzeklovakia sa Miss Uniworld 2015 pageant para mapigilan ang bansa nito na magsimula ng digmaang pandaigdig. Sa pagtanggap ni Erika sa misyong ito, magiging bahagi ang dalawa sa nakalolokang mundo ng beauty pageants sa kanilang action-packed adventure sa paghahanap sa nawawalang Miss Uzeklovakia.
Kasama ring makikigulo sa Beauty and the Bestie sina Marco Masa, Alonzo Muhlach, Badji Mortiz, Karla Estrada, Ryan Bang, MC Calaquian, at Lassy.
SHOWBIZ KONEK – Maricris Valdez Nicasio
