HATAW! D'yaryo ng Bayan hatawtabloid.com
ISA kami sa natuwa dahil sa wakas, nabigyan na ng first starring role sa isang teleserye si Miles Ocampo. Nagulat nga kami nang humarap ito sa presscon ng And I Love You So ng ABS-CBN at Dreamscape Entertainment Television dahil nag-iba ang hitsura. Pumayat at lumabas ang tunay na ganda at dalagang-dalaga na.
Makakasama ni Miles sa And I Love You So na mapapanood na sa Disyembre 7 sina Inigo Pascual, Julia Barretto, Angel Aquino, at Dimples Romana.
Gagampanan ni Miles ang karakter ni Joana Ramirez, ang mabait na anak ni Michelle (Dimples).
Mabigat ang karakter na ginagampanan ni Miles kung ikokompara sa mga ginawa na niya tulad ng light comedy na Home Sweeties Home, Luv U at iba pa. Kaya naman excited din ang dalaga. “Rati napapanood ko lang ‘yun. Na ‘yung isa inaapi, ‘yung isa ipagtatanggol niya ang sarili niya. So ‘yung process ng paggawa namin ng show masaya so excited ako na mapanood nila.”
Iikot ang kuwento sa kanilang dalawa ni Julia (Trixie) na magkakompetensiya sa lahat ng bagay tulad ng sa eskuwelahan at pag-ibig. Kaya naman natanong ang dalaga kung may sapawan kayang mangyari sa kanila ni Julia lalo’t iyon ang nakita sa trailer ng I Love You So.
“Sobrang close kami ni Julia. Sobrang nakatutuwa nga na ang bilis naming nag-click together. Kapag may scenes kami na magkasama ang hirap magpigil lagi ng tawa kasi sobrang masaya kami,” paliwanag ni Miles at iginiit na never silang nagkasapawan. Ginagawa lamang daw nila ang kanilang trabaho.
SHOWBIZ KONEK – Maricris Valdez Nicaiso
