HATAW! D'yaryo ng Bayan hatawtabloid.com
NANAY ng isang batang may cancer ang papel ni Ina Feleo sa pelikulang Child Haus ng BG Production International ni Ms. Baby Go. Anak niya rito ang award winning child actress na si Therese Malvar na kakikipaglaban sa sakit na leukemia.
Ipinaliwanag ni Ina ang papel niya rito. “Ginagawa niya ang lahat para sa anak niya, basically, pinakita ko rito yung typical na pinagdadaanan ng isang nanay. May problema lang na na-create, dahil sa aming dalawa, si Therese ang mas strong,”
Ano ang masasabi niya kay Therese na sa murang edad ay dalawang Best Actress award na ang nakuha? “Magaling si Therese kasi natural siyang umarte. Wala naman kaming masyadong iyakan sa pelikula, walang ganoon. I like na yung acting niya, tama lang sa edad niya. Hindi parang trying to be mature, hindi rin pabebe. Very natural, hindi parang in-acting lang,” saad ni Ina.
Dagdag pa niya, “Malaki talaga ang potensiyal pa niya. Hindi siya mayabang. Pati ang nanay niya, ‘pag nakakausap ko, simple lang din. Tatagal pa siya.”
Si Therese ay nagwaging Best Actress sa unang Cine Filipino Film Festival para sa indie film na Ang Huling Cha-Cha ni Anita na kabilang ang Superstar na si Nora Aunor sa mga nakalaban niya. Sa katatapos na Cinema One Originals Film Festival 2015, wagi ring Best Actress ang talented na alaga ni Ferdie Lapus para sa pelikulang Hamog.
Samantala, ipinahayag sa amin ni Ina na nakaka-relate siya sa ginampanang role sa pelikulang Child Haus. Biktima kasi ng cancer ang kanyang ama. Si Ina ay anak ng award-winning actor at director na sina Johnny Delgado at Laurice Guillen, respectively.
“Nakaka-relate talaga. Alam ko ang feeling ng may pinagdadaanan sa buhay like cancer with someone you love, kasi cancer victim rin ang Dad ko. So, madali na sa akin iyong role dahil nandoon lang iyon.
Idinagdag pa niyang dahil sa nangyari sa Dad niya, mas naging health conscious daw siya. “Mas naging aware ako ngayon sa mga health issues. Mas naging conscious ako sa aking diet at lifestyle. Simula noon, bawas na ako sa fast foods o sa mga chips. Tapos, may exercise rin at siyempre, clean and healthy living to live a stress-free life.
“Actually, si Daddy hindi niya nagawa iyon, siguro kulang pa siya sa push noon to fight his cancer.”
Ang Child Haus ay isang advocacy film na mula sa pamamahala ni Direk Louie Ignacio. Ito ay kasaysayan ng mga batang may cancer na pinipilit maging normal ang buhay, sa kabila ng kanilang karamdaman. Bukod kina Ina at Therese, tinatampukan ito nina Katrina Halili, Vince Magbanua, Mona Louise Rey, Felixia Dizon, Erika Yu, Leni Santos, Christopher Roxas, at iba pa.
Ito ay kalahok sa 14th Dhaka International Film Festival sa children’s section category sa Bangladesh.
ALAM MO NA! – Nonie V. Nicasio
