No. 2 drug dealer, 3 pa tiklo sa Cubao

NAARESTO ang apat na lalaki, kabilang ang isang no. 2 top drug personality, sa buy-bust operation ng mga operatiba ng National Capital Regional Police Office-Regional Anti-Illegal Drugs Special Operation Task Group (NCRPO-RAIDSOTG) sa Cubao, Quezon City kahapon ng umaga.

Kinilala ng mga nadakip na si Ferdinand Balatbat, alyas Jun Gapo, ang no. 2 drug personality; alalay niyang si Jerald Granada, Raymond Marasigan, at Jose Sumeria, taxi driver.

Ayon kay SPO4 Arsenio Caraveo ng RAID, SOTG, isinagawa ang operasyon makaraang magreklamo sa kanilang tanggapan ang isang residente sa isang compound na nagdududa sa rami ng taong labas-masok sa isang pinauupahan niyang bahay sa No. 57 Mariz St., kanto ng New York, Cubao, Brgy. E. Rodriguez sa lungsod.

Makaraang manmaman, nabatid ng pulisya na ang nasabing bahay ay ginagamit ni Balatbat sa operasyon ng ilegal na droga.

Si Balatbat ay napag-alaman nilang notoryus na drug pusher at kalalaya lamang kamakailan sa piitan dahil sa kahalintulad na kaso.

Sa puntong ito, nakipag-transaksyon ang mga awtoridad kay Balatbat sa pamamagitan ng pagbili ng shabu na halagang P50,000.

Nagresulta ang operasyon sa pagkakadakip kay Balatbat at tatlong iba pa.

Sa pagsisiyasat sa bahay ni Balatbat, narekober ang mga piraso ng plastic sachet ng shabu na nagkakahalaga ng P50,000, gayondin ang ilang piraso ng drug paraphernalia.