Robredo tututukan ang karapatan ng kababaihan

GAGAMITIN ni Liberal Party vice president bet Leni Robredo bilang bentahe ang pagiging tanging babae sa karera sa pagka-bise presidente upang isulong ang karapatan at patas na trato sa kababaihan.

“Iyon ang ipinaglalaban natin. Para ma-equalize ang lahat ng inequalities sa lipunan. Pagdating sa babae, marami pa talagang inequalities na nag-e-exist,” wika ni Robredo.

“In fact, bilang kinatawan ng aming distrito, isa ito sa aking binigyang pansin, upang mabago ang ibang mga batas na nagsusulong ng inequalities,” dagdag ni Robredo.

Para kay Robredo, maganda na maraming kandidatong babae sa 2016 elections dahil ito ang magiging daan upang mabigyang pansin ang mga isyu ukol sa kababaihan.

“Kung may babaeng kandidato, puwedeng kumuha ito ng atensiyon sa pangangailangan na baguhin ang mga batas at ilang estruktura ng lipunan upang mawala ang inequalities na ito,” ani Robredo.

Isa sa mga inihain na batas ni Robredo ang House Bill No. 3432 o ang Anti-Discrimination Act of 2013, na nagbibigay proteksiyon sa karapatan ng bawat Filipino laban sa ano mang uri ng diskriminasyon sa lipunan.

Sa panukala, ipagbabawal na ang anumang uri ng diskriminasyon batay sa kasarian, sexual orientation, lahi, relihiyon, kulay, civil status, HIV status at iba pang kondisyong medikal.

“Kahit nakapaloob na sa batas ang patas na trato para sa lahat, ang katotohanan, marami pa rin Filipino ang nakararanas ng diskriminasyon sa kanilang pang-araw-araw na buhay,” wika ni Robredo.