Jervy Cruz ipinasa sa Ginebra

ISANG trade ang inayos ng PBA kahapon bago ang biyahe ng liga patungong Binan, Laguna para sa doubleheader mamaya sa Smart Bro Philippine Cup.

Ayon sa isang source, mapupunta sa Barangay Ginebra si Jervy Cruz mula sa Barako Bull kapalit ni Rodney Brondial.

Matagal na planong i-trade ng Energy si Cruz ngunit kahapon lang ito naayos at inaasahang aaprubahan ito ni Komisyuner Chito Narvasa anumang oras.

Inaasahang lalaro na si Cruz para sa Gin Kings mamaya kontra Meralco habang si Brondial naman ay sasabak para sa Barako kontra Mahindra ngayon din.

Binanggit din ng source na mas magagamit nang husto si Cruz sa Ginebra dahil sa husay niyang tumira sa labas na tamang-tama sa pagtakbo ni coach Tim Cone sa triangle offense ng Gin Kings.

(James Ty III)