‘Di para sa akin ang Darna, wala akong sexy body — Sarah

NAGULAT ang singer-actress na si Sarah Geronimo nang matanong ito ni Mario Dumaual, ABS-CBN reporter, ukol sa posibilidad na mag-Darna sa presscon ng kanyang From The Top concert na magaganap sa December 4 at 5 sa Araneta Coliseum.

May mga fan daw kasing humihiling na gampanan ni Sarah ang role ni Darna. “Sorry, wala akong sexy body,” giit ng batang aktres. “Ako, personally, parang hindi para sa akin ‘yon.

“Hindi ako magtu-two-piece, never akong magtu-two-piece.

“At saka ano po, kailangan physically strong ka roon, maraming demands ang pagiging ‘Darna’.”

Hindi naman ikinaila ni Sarah na pangarap ding niyang makaganap ng isang heroine, subalit hindi niya nakikita ang sarili na magiging Darna.

“Pinangarap ko rin naman lalo na noong bata ako, si Lara Croft nga ang peg ko, eh!” natatawang sabi ni Sarah. “Siguro, in the future, gusto ko pong mag-action movie pero siguro po hindi Darna. Hindi para sa akin ‘yon,” giit pa ni Sarah.

Samantala, sold-out agad ang ticket ng concert ni Sarah para sa Dec. 4 kaya naman dinagdagan pa ito ng isang araw, Dec. 5 na mag-uumpisang makabili ng ticket para sa date na ito ngayong araw, Nobyembre 7.

Ang From The Top concert ay ang ika-walong major concert ni Sarah. Talagang malayo na ang narating niya bilang singer na unang napansin ang galing nang sumali siya Star for a Night Singing contest noong 2002.

Mula sa pagiging Pop Princess ngayo’y certified pop icon na si Sarah na umani na ng maraming tagumpay hindi lamang sa pagiging singer pati na rin sa pagiging magaling na aktres.

Ang From the Top ay ididirehe ni Paolo Valenciano at si Louie Ocampo naman ang musical director. Ito ay mula sa produksiyon ng Viva Live, Inc..

SHOWBIZ KONEK – Maricris Valdez Nicasio