De Ocampo nagpapagaling na sa bahay

UMUWI na sa kanyang bahay sa Cavite ang pambatong swingman ng Talk n Text na si Ranidel de Ocampo pagkatapos na nakaratay siya ng isang linggo sa Makati Medical Center.

Matatandaan na biglang namanhid ang likod ni De Ocampo dahil sa herniated disc habang nagbuhat siya ng timbang sa ensayo ng Tropang Texters noong Oktubre 25 sa Moro Lorenzo Gym.

Tumagal ng isang linggo ang pahinga ni De Ocampo sa ospital bago siya pinayagang umuwi lalo na nagkasabay ito sa ika-13 na kaarawan ng kanyang anak na si Madeleine.

“Two weeks pa yung recovery, tapos rehab na after nun,” wika ni de Ocampo sa panayam ng isang sports website. “Sabi niya (coach Jong Uichico) lang magpagaling ako.”

May isang panalo at isang talo ang TNT sa team standings ng Smart Bro Philippine Cup at balik-aksyon ang Texters sa Nobyembre 11 sa ULTRA sa Pasig kalaban ang sister team nilang Meralco.

Tatagal mula anim hanggang walong linggo ang pahinga ni De Ocampo bago siya makabalik sa court. (James Ty III)