Leni Robredo suportado pagbura sa PDAF

SUPORTADO ni Liberal Party vice presidential candidate Leni Robredo ang pagbuwag sa Priority Development Assistance Fund (PDAF), sa pagsasabing ang pork barrel system ay bukas sa pag-abuso sa diskresiyon na ibinigay sa mga mambabatas.

 ”Iyong PDAF, grabeng discretion ang ibinigay. Iyong discretion ang nakatutukso na maabuso kaya naman tinanggal na iyon,” wika ni Leni Robredo.

“Mas mabuti na ang lahat ng programa ay dadaan na talaga sa propers channels ng gobyerno.  Sinisiguro na walang makalulusot na kaduda-dudang proyekto,” dagdag ni Leni Robredo, dating abogado sa Public Attorney’s Office.

Nang mabulgar ang PDAF scam ilang buwan matapos magsimula ang termino bilang mambabatas, isinulong ni Robredo ang patas na imbestigasyon ukol sa kontrobersiya.

Sa deliberasyon sa PDAF, nais ni Leni Robredo na sukatin ang performance ng local government units (LGU) na nais humingi ng nasabing pondo, na adhikain nila ng asawa at yumaong DILG Secretary Jesse Robredo.

Sa kasalukuyan, isinusulong ni Robredo ang isang sistema na magbibigay ng pagkakataon sa ordinaryong mamamayan, kahit sa barangay level, na magpanukala ng proyekto na sa tingin nila ay para sa kanilang ikabubuti.