2 miyembro ng robbery gang itinumba ng lider

PATAY ang dalawang miyembro ng notoryus na grupo ng mga magnanakaw makaraang pagbabarilin ng kanilang lider at iba pang mga tauhan sa Caloocan City kahapon ng madaling-araw.

Agad binawian ng buhay si Buenaventura Velasquez, alyas Jong-Jong, 26, ng 69 Doña Aurora St., Area D, Brgy.177, Camarin, habang hindi na umabot nang buhay sa Tala Hospital si Rolando Querol, alyas Bobong, 25, ng Block 8, Lot 4, Anna Maria Heights ng nasabing barangay.

Pinaghahanap ng mga pulis ang suspek na si Erick Mayoni at kanyang mga tauhan, mabilis na tumakas makaraan ang pamamaril.

Batay sa ipinadalang ulat ni Senior Supt. Bartolome Bustamante, hepe ng Caloocan Police, naganap ang insidente dakong 2 a.m. sa kanto ng Sto. Niño at Sunflower Streets, Sitio Maligaya, Brgy. 177, Camarin.

Nauna rito, umatake ang grupo ng mga magnanakaw sa Quezon City at nakakulimbat nang malaking halaga ng pera at mga alahas ngunit hindi pinartihan ni Mayoni sina Velasquez at Querol.

Bunsod nito, hinanting ng dalawang biktima si Mayoni at nabaril sa hita ang lider ngunit nakatakas.

Muling bumuo ng grupo ang lider at hinan-ting ang dalawa at nang matiyempohan ay agad pinagbabaril.