HATAW! D'yaryo ng Bayan hatawtabloid.com
KRUSYAL ang 81-73 na panalo ng National University kontra De La Salle sa UAAP Season 78 noong Miyerkoles bago ang pahinga ng liga dulot ng Undas.
Malaking tulong para sa Bulldogs ang point guard na si Jay-J Alejandro sa panalo nila kontra Green Archers dahil napanatili ng NU ang maliit na tsansang makapasok sa Final Four at mapanatili ang kanilang titulo sa UAAP Seniors na napanalunan nila noong isang taon.
Nagtala si Alejandro ng 25 puntos, 17 sa huling quarter, kung saan binura ng NU ang doble pigurang kalamangan ng La Salle sa ikalawang quarter.
Dahil dito, napili si Alejandro bilang Player of the Week ng UAAP Press Corps.
“Kailangan ko mag-step up,” wika ni Alejandro na dating manlalaro ng Mapua Red Robins. “Si Pao (Javelona), foul trouble, tapos na-sprain pa si Kyle (Neypes), so siguro, ‘yung mindset ko lang is kung ano ang maitutulong sa team, gagawin ko lang.”
Sa ngayon ay may limang panalo at pitong talo ang Bulldogs kaya naniniwala si NU coach Eric Altamirano na hindi pa tapos ang laban.
“Alam naman ni Jay ang role niya sa team, and he’s really doing it to the hilt. Siya ‘yung spark namin ngayon, so we’ll ride on his back right now,” ani Altamirano.
(James Ty III)
