Sumampa sa payloader bata nagulungan, todas (3 kalaro ligtas)

DAVAO CITY – Agad nalagutan ng hininga ang 8-anyos batang lalaki makaraang masagasaan ang ulo nang mahulog mula sa sinampahang payloader kamakalawa.

Ayon sa ulat, habang nagkakarga ng graba at buhangin ang payloader sa Sebusa River, sa bayan ng Matanao, Davao del Sur, nang biglang sumampa ang apat naliligong mga bata.

Kinilala ang mga batang sina Juanito Gallos, 12; Jeffrey Lanticse, 8; alyas Odong; at ang namatay na si Jojie Lapis, 8.

Ang nasabing payloader ay pagmamay-ari ng isang Marcel Mariano, negosyante at residente ng Matanao, Davao del Sur.

Minamaneho ito ng isang Apolonio Albaracin, 33, residente ng Brgy. Sebusa, Bayan ng Matanao, Davao del Sur.

Agad inaresto ng mga pulis at inimbestigahan ang pay loader operator na nahaharap sa kaso sa pagkamatay ng 8-anyos biktima.