Ria Atayde, masaya sa mga papuri ni Sylvia Sanchez!

KINUHA namin ang reaksiyon ni Ria Atayde sa FB post ng mother ni-yang si Ms. Sylvia Sanchez. Nagpost kasi sa Facebook kamakailan si Ms. Sylvia ng: “Wala lang kakaproud ka lang sobra anak, my potpot saya saya ko lang love u so much.”

Tinutukoy ng veteran actress ang magandang performance ng anak sa hit TV series na Ningning ng ABS CBN. Ayon kay Ria nakatataba ng puso ang post ng kanyang ina dahil gusto talaga niyang maging proud ang parents niya sa kanya.

“Nakakatuwa po at nakakataba ng puso. Goal ko naman po talaga is to make them proud and knowing that she’s proud of me makes me want to work even harder and do even better at my craft,” saad ng magandang aktres.

Nabanggit ni Ria sa panayam ko sa kanya na nakapasok siya sa showbiz thru audition dahil hindi uso sa pamilya nila ang palakasan.

“Nag-audition po ako for the role sa Ningning, pero ine-expect ko talaga na iisipin ng ibang tao na may palakasan. Kasi, ganoon naman po ‘di ba? Iniisip ng iba na lahat ay gumagamit ng koneksiyon.

“Pero nag-audition po ako rito. So, yun po ang pinanghahawakan ko ngayon sakaling may magsasabi na, ‘Nakapasok lang naman ‘yan dahil anak ‘yan ni Sylvia at kapatid ni Arjo.’ Sa akin hindi po ganoon, dahil alam kong nag-audition ako para rito,” diin niya.

Naalala ko tuloy ang nasabi ni Ms. Sylvia sa akin sa pagpasok ng kanyang mga anak sa showbiz.

“Sobrang proud ako kina Arjo at Ria, kasi pinagbubutihan at ginagalingan talaga nila ang kanilang trabaho.

“Ang palagi kong sinasabi sa kanila, be professonal, huwag pasaway, mahalin ang trabaho, mag-aral lagi sa mga role na ibibigay sa kanila, at respeto sa kapwa tao at mga kasama sa trabaho.

“Pangalawa sabi ko, maging professional kayo, ayaw kong makakarinig na nale-late kayo. Kasi, ako mismo ang sasapak sa inyo. Kasi, wala akong record na pasaway sa set, e.

“Kaya sabi ko nga, yung kabaitan ko, ‘yung pakikisama ko, ngayon ko lang na-realize na kapag nalaman nilang mabait si Sylvia, ang expectation nila ay mabait din iyong anak. So, kabit-kabit na iyon e, yung nanay mo ay ganito, kaya dapat ay ganito ka rin. Hindi ba?” saad pa ng premyadong aktres.

Si Ria ay gumaganap bilang Teacher Hope sa top rating TV series na Ningning sa ABS CBN na pinagbibidahan ng child star na si Jana Agoncillo.

Bukod kina Ria at Jana, kabituin din dito sina John Stevens de Guzman, Ketchup Eusebio, Tanya Garcia, Sylvia Sanchez, Vandolph Quizon, Nyoy Volante, Mercedes Cabral, Pooh, Freddie Webb, at iba pa.

Ano ang masasabi ni Ria sa taas ng ratings ng Ningning?

“Of course, super nakaki-kilig and nakaka-proud na patuloy kaming sinusuportahan ng viewers! Parang, nakakagana din po… iyong inspiration namin silang mga suking viewers ng Ningning, to do better and continue sa pagbigay ng magagandang kuwento sa kanila.

“Super grateful din po ako, kasi without the viewers, hindi po posible yun.”

Sinabi rin ni Ria na dapat na patuloy tutukan ang kanilang TV series sa Kapamilya Network dahil sa mga kaabang-abang na kaganapan dito.

“Marami pa pong magaganap sa Ningning, patuloy pa din siyang magiging realistic at nakakatuwa. May mga bagong papasok na character ulit kaya sana mag-abang po silang lahat para doon.”

Nakaka-excite?

ALAM MO NA! – Nonie V. Nicasio