Leni Robredo: Walang dapat maiwan sa pag-unlad ng bansa

SISIKAPIN ni Liberal Party vice presidential bet Leni Robredo na walang maiiwang Filipino dahil mahalaga lahat.

“Nasa stage tayo sa ating bansa na marami tayong narating in terms of economic growth ngunit ang kulang dito ay pagiging inclusive,” giit ni Robredo.

“Ito ang ating magiging mission, to make sure na kung ano ang nararamdaman sa itaas, nararamdaman din sa ibaba,” aniya.

Nais ni Robredo na tiyakin na ang pangunahing serbisyo ay naibibigay sa pinakamaliit na tao sa pinakamalayong lugar.

Ayon kay Robredo, ang kanyang mga nabanggit ay pagpapatuloy lang ng kanyang pananaw sa paninilbihan mula nang maupong kinatawan ng Camarines Sur.

Paliwanag ni Robredo, isa sa mga susi para mangyari ito ay tulong na ibinibigay ng local government units (LGU).

“Naniniwala tayo na kapag nag-step-up ang local government units, ito ang sagot sa kahirapan,” wika ni Robredo.

“Ang LGUs kasi, parang sila ang basic deliverer ng services. Sa kanila umaasa sa basic services, kanila umaasa sa education at sa kanila rin ang livelihood,” dagdag niya.

“Marami nang LGUs ang nakagagawa nito ngunit kailangan rin kumilos ang iba pa para tulungan ang national government sa pagtugon sa kahirapan,” ani Robredo.