PBA board magpupulong ngayon (Tungkol sa Gilas)

GAGAWIN ngayong araw ang espesyal na pulong ng Board of Governors ng Philippine Basketball Association (PBA) tungkol sa magiging susunod na plano ng liga para sa Gilas Pilipinas.

Pangungunahan ng bagong tserman ng PBA board na si Robert Non ng San Miguel Corporation ang nasabing pulong na gagawin sa opisina ng liga sa Libis, Quezon City, kasama ang pangulo at CEO na si Atty. Chito Salud at ang bagong komisyuner na si Chito Narvasa.

“I don’t want to preempt the board. The special meeting tomorrow (ngayon) will talk about just one topic – Gilas,” wika ni Salud sa press conference ng liga kahapon sa Manila Diamond Hotel. “The board, through the leadership of chairman Non, will come out with a clear-cut, unambiguous position on this.”

“I don’t think there is any restraint from any of the governors,” dagdag ni Narvasa. “As far as I’m concerned, the PBA is fully supportive of all the efforts of the SBP (Samahang Basketbol ng Pilipinas) in international competitions.”

Matatandaan na unang sinabi ng pangulo ng SBP na si Manny V. Pangilinan na sasali ang Gilas sa Olympic qualifying tournament sa susunod na taon kung sasang-ayon ang PBA sa pagnanais ng SBP na ipadala ang malakas na koponan para sa torneo.

Ang Olympic qualifying tournament ay para punuan ang huling tatlong puwesto para sa 2016 Rio Olympics.

Nakuha ng Gilas ang karapatang sumali sa Olympic qualifying pagkatapos na makuha ang runner-up na puwesto sa huling FIBA Asia Championships na ginanap sa Tsina kamakailan.

Nagbanta ang FIBA na paparusahan ang SBP kung hindi sasali ang bansa sa Olympic qualifying.

Samantala, idinipensa ni Chairman Non ang hindi pagsali ng crowd favorite na Barangay Ginebra San Miguel sa unang laro ng PBA Philippine Cup sa Linggo sa Smart Araneta Coliseum.

Imbes ay maghaharap ang sister team ng Ginebra na Star Hotdogs at Rain or Shine sa nag-iisang laro sa alas-5:15 ng hapon pagkatapos ng opening ceremonies sa alas-tres.

(James Ty III)