Luhaan ang mga nangabigo kay Mayor Digong Duterte

AYAW talagang maghulas ang bilib ng inyong lingkod kay Davao Mayor Rodrigo “Digong” Duterte.

Si Digong hindi lang macho sa pisikal na kaanyuan kundi hanggang sa kanyang paninindigan ay masasalamin ang ganyang katangian.

Siya yata ‘yung kapag nagsabing “oo” ay OO at ang “hindi” ay HINDI.

Alam nating marami ang nagbubuyo sa kanya para tumakbong presidente…

‘Yung iba ay tunay na naniniwalang mayroon siyang magagawa para sa bansa.

Pero ‘yung iba, mukhang balak lang gamitin ang ipinundar niyang pangalan.

Kaya sa ikalawang pagkakataon nang ideklara ni Digong Duterte na hindi siya tatakbong presidente, tila nakita nating ‘bumaha ang luha’ ng mga naunsiyami at umasang magbabago ang isip ni Duterte sa kanyang naunang pahayag.

‘Yun bang tipong jingle na jingle na pero pinigil kaya biglang binalisawsaw?! Ang sakit no’n ‘di ba?!

Parang gusto nating ma-imagine ang paglaylay ng malalapad na balikat…

Ano sa palagay ninyo, Mr. Lito “Bigas” Banayo?!

‘E bakit naman kasi ayaw tantanan si Digong?!

Ang linaw naman ng isip at paninindigan no’ng tao. Ayaw niyang manloko ng kapwa.

Kung sa lokal lang ‘yan, walang problema, alam niyang epektibo niyang mapapamunuan ang kanyang mga kababayan.

‘E kung sa national level nga naman, alam na alam niyang hindi naman presidente ang kailangan ng mga ‘tunay na makapangyarihan’ kundi ‘puppet’ na mapasusunod sa mga gusto, probetso at kapritso nila.

Kaya niyang labanan ang sistemang ganito pero alam niyang madugo at mas malaki ang maisasakrispisyo.

Marami kasi tayong mga kababayan, na magaling at matapang magsalita pero kapag harapan na, unang-unang nagiging ‘BOY AREGLO.’

Kahit itanong pa ninyo kay HENERAL LUNA.

Sabi nga ng magiting at matapang na heneral: “Para kayong mga birhen na naniniwala sa pag-ibig ng isang puta!”

Ganyang-ganyan tayong mga Pinoy kapag eleksiyon.

Alam nating ang ultimong hangarin ng mga politiko ay ‘pagpuputa’ pero patuloy pa rin tayong naniniwala sa iniluluhog nilang ‘pag-ibig’ kuno sa Inang Bayan.

Pero si Digong Duterte, hindi siya maibibilang sa mga “putang nagluluhog ng pag-ibig.” 

Para sa inyong lingkod, si Digong ay isang genuine na LINGKOD NG BAYAN.

‘Yun nga lang, ang bulok na sistema ay laging naririyan para lamunin ang mga gaya ni Digong.

Sana ay dumami pa ang lahi at mga katulad mo, Mayor Digong…

Mabuhay ka!

Para sa mga reaksiyon, suhestiyon, reklamo at sumbong, magtext sa 0926.899.91.27 o mag-email sa JERRYAP888@YAHOO.COM. Para sa mga nakaraang isyu ng BULABUGIN please visit https://hatawtabloid.com